صحيفة صدى الاحداث السودانية


قانون سكسونيا
1 مايو 2017 18:45

سألني أحد هم :
– هل تمت محاكمة من قاموا بالتغول على المدينة الرياضية وباعوا معظم أراضيها وقبضو أثمانها ودخلوها جيوبهم ؟
– لا والله ما أفتكر

– لكن يا أستاذ القصة دي مرت عليها سنوات
– ويعني شنووو؟ ما (هيثرو) ده مرت عليهو 8 سنوات إتغير فيها كم (وزير عدل) وكم (نائب عام) وكم شنو ما بعرف .. (بالمناسبة المقال ده فيهو كسرة جديدة !!)
– طيب يا أستاذ تفتكر شركات الأدوية الوهمية اللهطت (ملايين) دولارات الدواء ح يتحاكمو؟
– هو كدي اليوروهم لينا منو في الأول !!
– تقصد شنو يا أستاذ ؟
– إنتا سمعتا بقانون (سكسونيا)؟
– لا ما سمعتا بيهو ؟
– لفظ قانون (سكسونيا) ده بتسمع بيهو في معظم الأعمال الدرامية المصرية الزمان وتلاقيهو في الأفلام القديمة ، تلاقي الشخص المظلوم يقول ليك (ده قانون سكسونيا) ؟
– يعني شنو يا أستاذ كدي أشرح ليا
– قانون (سكسونيا ) ده بيرمز لتطبيق القانون علي الغلابة والفقراء وعدم تطبيقه علي الأغنياء وأصحاب النفوذ والمسؤولين .. وهو قانون ابتدعته حاكمة مقاطعة (سكسونيا) , وهي واحدة من المقاطعات الألمانية القديمة في العصور الوسطى.
– القانون ده بيقول شنو يا أستاذ؟
– بموجب هذا القانون يا عزيزي فإنّ المجرم يُعاقب بقطع رقبته إن كان من طبقة (الرّعاع) .. يعني المواطنين الزي حلاتي وحلاتك .. وهم عموم أفراد الشّعب االفقير الكادح الغلبان …
– طيب يا أستاذ لو (المجرم) من طبقة النبلاء والمسؤولين؟
– في الحالة دي العقاب بتاعو إنو يقطعوا رقبة (الضل بتاعو) !
– (في إستغراش) : كيفن يعني؟
– بسيطة .. يجيبو الكوز أقصد الزول (المجرم ده) ، بعد نص النهار لمن الضل (يرمي) ، ويقيف (شامخ) وراسو (فوق) وعلى شفتيه ترتسم إبتسامة ساخرة من (الجلاد) الذي يهوي بالفأس على (رقبة ظلّه) ، وهو ينظر في إزدراء من جمهور الشعب الفضل (الذي يصفّق مقهوراً بتنفيذ العدالة)!..
يعني ببساطة قانون (سكسونيا) بيقول لو (الحرامي) أو (المجرم) عموماً كان من أفراد الشعب الفضل المغلوب على أمره يُزجّ به فى السّجن ويُعاقب نتيجة لقيامه بالسّرقة.
أما لو كان من (الجماعة) فلا يُصاب بأيّ أذى لأنّ ظلّه هو من يُحاكم وتقطع رقبة ظله من (لغاليغا) !..
– لكن يا أستاذ عندنا قانون (سكسونيا) ده ذاااتو مافي .. نحنا ما عندنا مانع الناس (البتسرق) دي يجيبوها يقطعو (ضل رقبتا) ذي ما قانون سكسونيا بيقول ، أقل حاجة نعرف (السرقونا منووو) !
– كلامك صاح .. شوف يا عزيزي أنا بلاقي العذر لحاكمة ولاية (سكسونيا) إنها تعمل قانون معيب وغريب ذي ده (ما كافرة وكده) .. لكن ما بلاقي أي عذر لي ناس (لو سرقت فاطمة بنت محمد) ديل … هسه الجرايد ليها مدة يقولو ليك (المتهمين في قضية دولارات الدواء) ، أها ولا جريدة واااحدة جابت أسماء المتهمين ديل مع إنهم ضاربين ليهم ملايين الدولارات ، وكمان (ناس هيثرو) لي هسه كم سنة ما عارفين القبض تمنو منو ؟ والمشاركين في (اللبعة) دي منو؟ وناس (المدينة الرياضية) ما عارفين الباعا قطع سكنية ومحلات منو؟ وناس شنو ما بعرف … وكل لصوص هذا العهد الزاهي النضير كان أخير لو طبقوا فيهم قانون (سكسونيا) ، وجابوهم قطعوا ليهم (ضل رقبتهم) والناس عرفتهم بدل (اللولوة) و (التعتيم) ده !!

– كسرة :
– بي مناسبة اللولوة والتعتيم .. الليلة في كسرة جديدة لنج !!

• تنبيه : توجد (واو) جديدة
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+(وووووووووووو) +و+و+و+و+و+و+و+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)+و+و+و+و+و+و+و+و+و
• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (وووو)+(وووو) +و+و+و+و+و+و+و

تعليقات 0 | إهداء 0 | زيارات 130



تعليقات الفيس بوك

خدمات المحتوى


الفاتح جبرا
 الفاتح جبرا

تقييم
5.38/10 (4 صوت)